Disa ushqime freskuese që nuk duhet të mungojnë gjatë verës

Temperaturat e larta të verës kërkojnë jo vetëm kujdes me lëngjet, por edhe një përzgjedhje të zgjuar të ushqimeve. Disa produkte jo vetëm që ndihmojnë në hidratim, por edhe ndihmojnë organizmin të përballojë më lehtë nxehtësinë. Ja disa nga ushqimet më freskuese që rekomandohen gjatë ditëve të verës.

Shalqiri

Është ndër frutat më të konsumuara në verë dhe me arsye të fortë. Përmban mbi 90% ujë, është i pasur me vitamina dhe ka efekt qetësues për organizmin. Mund të konsumohet i ftohtë ose i shoqëruar me djathë të bardhë për një vakt të lehtë.

Kastravecat

Të pasur me ujë dhe shumë të lehtë për stomakun, kastravecat janë idealë për sallata të shpejta ose si ushqim i freskët gjatë ditës. Ndihmojnë në hidratim dhe kanë efekt ftohës.

Kosi

Kosi është burim probiotikësh dhe proteinash të lehta për t’u tretur. Mund të konsumohet i thjeshtë ose me fruta. Në ditët e nxehta mund të shërbehet edhe si dhallë me kripë dhe pak ujë.

Frutat e pyllit

Manaferrat, boronicat dhe mjedrat janë të pasura me antioksidantë dhe kanë pak kalori. Mund të përdoren në smoothie, sallata frutash ose të konsumuara direkt gjatë ditës.

Lëngjet e freskëta

Lëngjet e përgatitura në shtëpi nga fruta të freskëta janë mënyra më e mirë për të qëndruar të hidratuar. Portokalli, limoni, molla apo pjeshka janë disa nga zgjedhjet më të shëndetshme, përveç ujit.

Në verë është e rëndësishme të shmangen ushqimet e yndyrshme dhe të nxehta që lodhin organizmin dhe e dehidratojnë. Sa më i thjeshtë të jetë ushqimi, aq më shumë e ndihmon trupin të përballojë temperaturat e larta.