Forumi i Funksioneve të Rojës Bregdetare Mesdhetare zhvillohet në 29-31 tetor në Tiranë

Forumi i Funksioneve të Rojës Bregdetare Mesdhetare do të mbajë mbledhjen e tij të radhës në Tiranë nga data 29 deri më 31 tetor, nën organizimin e Forcës Detare dhe Rojës Bregdetare shqiptare. Ky forum synon të thellojë bashkëpunimin mes agjencive të rojeve bregdetare të vendeve të Mesdheut, duke mbledhur përfaqësues nga 14 shtete anëtare, dy vende vëzhguese, si dhe përfaqësues të pesë agjencive dhe institucioneve të Bashkimit Europian, së bashku me organizata ndërkombëtare dhe institucione kombëtare.

Tema e këtij viti është "Sfidat e Reja në Detin Mesdhetar: Ekonomia Blu, Tranzicioni Ekologjik dhe Funksionet e Rojës Bregdetare." Gjatë dy ditëve të forumit, pjesëmarrësit do të angazhohen në katër panele ku do të trajtohen praktikat më të mira dhe do të promovohen bashkëpunimet ndërmjet vendeve pjesëmarrëse.

Forumi MCGFF ofron një mundësi të veçantë për të përforcuar bashkëpunimin rajonal dhe për të trajtuar sfidat e përbashkëta të Mesdheut, duke synuar mbrojtjen e burimeve dhe sigurinë detare në një kontekst të integruar.

I krijuar si një platformë vullnetare, jo politike dhe e pavarur, Forumi i Funksioneve të Rojës Bregdetare Mesdhetare (MCGFF) përfshin 24 vende të Mesdheut. Takimi i tij i parë u mbajt në vitin 2009 në Genova, Itali, nën drejtimin e Italisë, ndërsa në vijim është zhvilluar në Francë, Spanjë, Portugali, Itali, Turqi, Francë, Marok, Itali dhe Shqipëri.