Italia miraton marrëveshjen për njohjen e pensioneve mes Italisë dhe Shqipërisë

Pas 15 vitesh negociata, Senati Italian ka miratuar marrëveshjen dypalëshe për njohjen e kontributeve të sigurimeve shoqërore mes Shqipërisë dhe Italisë. Ky vendim historik u garanton të drejtën e pensionit mijëra qytetarëve shqiptarë që kanë punuar në Itali dhe italianëve që kanë punuar në Shqipëri.

Marrëveshja siguron që çdo vit pune të llogaritet, duke lehtësuar përfitimin e pensioneve për pleqëri, invaliditet, familjar, si dhe ndihmën për sëmundje dhe papunësi. Ky zhvillim sjell siguri dhe perspektivë të re për rreth 550 mijë shqiptarë në Itali dhe 4 mijë italianë në Shqipëri.

Ky është një hap i rëndësishëm që forcon lidhjet mes dy vendeve dhe garanton më shumë mbrojtje sociale për punëtorët, duke u ofruar atyre stabilitet dhe siguri ekonomike.