Madrid mirëpret Shqipërinë me një ceremoni zyrtare para nënshkrimit të Marrëveshjes për Kongresin Botëror të Ligjit 2027

Kryeministri Edi Rama, gjatë vizitës së tij në Spanjë për ceremoninë e “Espanol Universal Award”, u prit sot nga Mbreti Felipe VI në pallatin Zarzuela, Madrid. Pas takimit, monarku organizoi një pritje për nder të Shqipërisë me anëtarët e bordit të “World Jurist Association”, organizatë prestigjioze e juristëve dhe akademikëve nga e gjithë bota. Ky event vjen në prag të nënshkrimit të marrëveshjes për organizimin e “World Law Congress Albania 2027” në Tiranë, ku pritet të marrin pjesë rreth 3 mijë juristë nga gjykatat supreme dhe sistemet gjyqësore të ndryshme globale.

Në pritjen e organizuar mori pjesë edhe Avokati Javier Cremades, President i Shoqatës Botërore të Juristëve dhe drejtues i firmës ligjore Cremades & Calvo-Sotelo. Ai është gjithashtu fitues i Çmimit Universal Spanjoll 2024 nga organizata joqeveritare Fundación Independiente dhe themelues i Fondacionit Botëror të Drejtësisë në Spanjë, duke e shndërruar vendin në një qendër kyçe për anëtarët e gjykatave më të larta nga pesë kontinentet.

Në ceremoni ishin të pranishëm edhe Kryetari i Gjykatës Kushtetuese të Spanjës, Cándido Conde-Pumpido; Kryetari i Gjykatës Kushtetuese të Gjermanisë, Stephan Harbarth; Ministri i Drejtësisë së Shqipërisë, Ulsi Manja, si dhe personalitete të tjera nga fusha e drejtësisë.