Ministria e Drejtësisë dhe Fakulteti i Drejtësisë së Elbasanit kryejnë një marrëveshje së bashku

Ministri i Drejtësisë, Ulsi Manja, dhe Rektoria e Universitetit të Elbasanit “Aleksandër Xhuvani”, Prof. Dr. Elvira Fetahu, nënshkruan një marrëveshje të rëndësishme, me qëllim përmirësimin e klinikave ligjore dhe forcimin e lidhjes mes arsimit të lartë dhe shërbimeve publike. Ky bashkëpunim përbën një hap të rëndësishëm në trajnimin e studentëve të drejtësisë dhe në rritjen e mundësive për qytetarët për të aksesuar shërbime ligjore.

Me anë të këtij memorandumi, studentët e drejtësisë do të kenë mundësinë të fitojnë eksperiencë praktike në Drejtorinë e Ndihmës Juridike Falas, duke kontribuar drejtpërdrejt në mbrojtjen e të drejtave të qytetarëve që kërkojnë asistencë ligjore. Ky program do t’i ndihmojë ata të përgatiten më mirë për tregun e punës, duke aplikuar njohuritë teorike në kushte reale dhe duke ofruar mbështetje për ata që kanë nevojë për ndihmë ligjore.

Kjo iniciativë hap mundësi për brezat e ardhshëm të profesionistëve ligjorë, të cilët do të luajnë një rol të rëndësishëm në përmirësimin e shërbimeve ligjore dhe në rritjen e aksesit në drejtësi për të gjithë qytetarët shqiptarë, pavarësisht kushteve të tyre financiare.

Për qytetarët e Elbasanit, ky Memorandum Mirëkuptimi ofron mundësinë e re për të marrë ndihmë juridike falas në Klinikën Ligjore të Universitetit “Aleksandër Xhuvani”. Ky shërbim do t’u mundësojë atyre një qasje më të drejtpërdrejtë dhe efikase në drejtësi, duke garantuar mbrojtjen e të drejtave të tyre në mënyrë më të shpejtë dhe të sigurt.

Në mbyllje të eventit, Ministri Ulsi Manja theksoi rëndësinë e këtij bashkëpunimi dhe u takua me studentët e fakultetit, ku vlerësoi angazhimin dhe përkushtimin e stafit akademik dhe profesoratit. Ai i falënderoi ata për rolin e tyre të rëndësishëm në ruajtjen e Elbasanit si një qendër të dijes dhe një epiqendër të zhvillimit të arsimit të lartë në Shqipëri.