Nancy VanHorn takohet me Prokurorin e Përgjithshëm Olsian Çela

E Ngarkuara me Punë në Ambasadën e Shteteve të Bashkuara, Nancy VanHorn, zhvilloi sot një takim me Prokurorin e Përgjithshëm, Olsian Çela, për të diskutuar mbi punën e Prokurorisë së Përgjithshme dhe përpjekjet e vazhdueshme për forcimin e shtetit të së drejtës në Shqipëri.

Gjatë takimit, znj. VanHorn nënvizoi rëndësinë e institucioneve të pavarura që veprojnë me integritet dhe transparencë, si një themel thelbësor për ndërtimin e një drejtësie të qëndrueshme dhe të besueshme. Ajo theksoi angazhimin e Shteteve të Bashkuara për të mbështetur Shqipërinë në përpjekjet e saj për reformën në drejtësi dhe ndërtimin e institucioneve që i shërbejnë qytetarëve me drejtësi dhe barazi.

Nga ana tjetër, Prokurori i Përgjithshëm, Olsian Çela, paraqiti një pasqyrë të punës së institucionit që ai drejton, duke shprehur vullnetin për të vijuar përpjekjet në luftën kundër korrupsionit dhe krimit të organizuar, si dhe për garantimin e sundimit të ligjit.

Takimi përforcoi rëndësinë e bashkëpunimit ndërmjet institucioneve shqiptare dhe partnerëve ndërkombëtarë, me qëllim ndërtimin e një sistemi drejtësie të fuqishëm dhe të qëndrueshëm për të mirën e popullit shqiptar.