Punimet në Unazën e Madhe të Tiranës drejt përfundimit: Publikohen pamjet nga kantieret

Paraditen e sotme, Zëvendëskryeministrja dhe Ministrja e Infrastrukturës dhe Energjisë Belinda Balluku ka ndarë në rrjetet sociale një video të re nga kantieret e Unazës së Madhe të Tiranës, ku shfaqen pamje të punimeve që po shkojnë drejt përfundimit.

Në videon e publikuar, shihen qartë pamjet nga kantieret e ndryshme, duke dhënë një pasqyrë të avancimit të punimeve në disa lote të projektit madhor për infrastrukturën e kryeqytetit. Në veçanti, në Lotin 2, janë realizuar 97.3% të punimeve, duke e sjellë këtë pjesë shumë pranë përfundimit. Ndërkohë, në Lotin 7 janë kryer 76% të punimeve, Loti 6 ka arritur në 65%, ndërsa në Lotin 5 janë realizuar 70% të punimeve. Në Lotin 4, progresi i punimeve ka arritur në 76%.

Ky projekt është një nga investimet më të rëndësishme për lehtësimin e trafikut dhe përmirësimin e infrastrukturës rrugore në Tiranë, dhe përparimi i tij po ndiqet me vëmendje të madhe nga autoritetet dhe qytetarët.

Me përfundimin e këtyre punimeve, Unaza e Madhe pritet të lehtësojë ndjeshëm qarkullimin në kryeqytet, duke ofruar një infrastrukturë moderne që do t’i shërbejë për dekada të ardhshme.