Shqipëria dhe Hungaria bashkëpunim për të forcuar lidhjet ekonomike

Në vijim të bashkëpunimit dypalësh mes Shqipërisë dhe Hungarisë, u zhvillua një takim i frytshëm me Ministrin e Ekonomisë së Hungarisë, Márton Nagy dhe Ministren e Bujqësisë dhe Zhvillimit Rural, Anila Denaj. Diskutimet u përqendruan në identifikimin e mundësive për të forcuar marrëdhëniet ekonomike mes dy vendeve, duke vendosur sektorin agroturistik si prioritet kryesor.

Ky sektor, i cili paraqet një potencial të madh për rritje në Shqipëri, u trajtua si një fushë strategjike për investime të reja dhe përmirësime. Gjatë bisedimeve, theksi u vendos te nevoja për të zhvilluar ekonomi shkalle, duke rritur cilësinë dhe standardet e produkteve shqiptare. Gjithashtu, u diskutua rëndësia e përmirësimit të aksesit në financime, një faktor vendimtar për të lehtësuar investimet dhe për të rritur konkurrencën e sektorit si në tregun vendas, ashtu edhe në atë ndërkombëtar.

Takimi shënoi një hap të rëndësishëm drejt forcimit të partneritetit mes dy vendeve dhe krijimit të një platforme të qëndrueshme për zhvillimin ekonomik, me fokus në agroturizëm dhe sektorët që lidhen ngushtë me të.